Бо дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷиҳати дар амал ҷорӣ намудани ташхиси бемории сил аз фазла (ахлот) дар кўдакон бо усули оддии якмарҳилагӣ мутахассисони марказҳои ҳимояи аҳолӣ аз бемории сили як қатор шаҳру ноҳияҳои мамлакат ба машғулияти омӯзишӣ фаро гирифта шуданд.
Бояд гуфт, ки қаблан барои ташхиси силро дар кӯдакон гузаронидан лозим меомад, ки дар кӯдакон сулфаи сунъӣ ба вуҷуд оварда шавад. Дар натиҷа кӯдакони то 10-сола балғамро фурӯ мебурданд, ки ин ҳолат барои ташхиси бемории сил мушкилиро ба вуҷуд меовард.
Ин усули оддии якмарҳалагӣ ном дошта, ки танҳо бо тасдиқи фазла, бе истифодаи дигар таҷҳизоти иловагӣ ташхиси силро муайян менамояд.
Мавриди зикр аст, ки ин усулро Ташкилоти умумиҷаҳонии тандурустӣ (ТУТ) барои дарёфти бемории сил тавсия медиҳад. То кунун дар Ҷумҳурии Тоҷикистон ин усул танҳо дар Беморхонаи сили кӯдаконаи шаҳри Душанбе ҷорӣ карда шуда буд. Акнун мутахассисони сатҳи марказӣ ва вилоятии марказҳои ҳимояи аҳолӣ аз бемории сил бо ин усули ташхис омӯзиш гирифта, дар марказҳои худ онро ҷорӣ хоҳанд кард.
Яъне, ҷорӣ намудани ин усули ташхис дар марказҳои ҳимояи аҳолӣ аз бемории сили шаҳру навоҳии мамлакат навгонӣ буда, имкон медиҳад, ки кӯдакон дар маҳалли зисташон бо роҳи осон аз ташхиси бемории сил гузаранд.
![](https://old.moh.tj/wp-content/uploads/2018/04/8678.jpg")
