Бо мақсади сазовор истиқбол гирифтани ҷашнҳои бузурги миллӣ, аз ҷумла 35-солагии Истиқлолияти давлатии Ҷумҳурии Тоҷикистон сохтмон, таъмиру тармим ва бо навтарин таҷҳизоту лавозимоти тиббӣ таъмин намудани муассисаҳои тандурустӣ дар тамоми гӯшаву канори мамлакат бомаром идома дорад.
Дар доираи чунин корҳои ободонӣ Маркази саломатии ноҳияи Рӯдакӣ аз таъмир бароварда шуда, дар он баҳри ташхису муоинаи беморон тамоми шароити мусоид фароҳам оварда шудааст.
Бино ба иттилои масъулин, аз оғози соли равон то кунун дар ҳудуди ноҳияи Рӯдакӣ дар сохтори шабакаи муассисаҳои кӯмаки аввалияи тиббию санитарӣ (КАТС) 7 бунгоҳи тиббӣ сохта ба истифода дода шудааст.
Дар муассисаҳои навбунёд низ ҷиҳати ба ташхису муоина фаро гирифтани беморон шароити мусоид фароҳам оварда шуда, дар натиҷа сатҳу сифати хизматрасонии тиббӣ ба аҳолӣ дар ноҳияи мазкур боз ҳам беҳтар гардида истодааст.
Дар назар аст, ки то охири соли ҷорӣ низ дар ҳудуди ноҳияи мазкур якчанд муассисаҳои кӯмаки аввалияи тиббию санитарӣ сохта ба истифода дода шаванд.
Чунин корҳои ободониву созандагӣ, фароҳам овардани шароити мусоиди ташхису муоина барои сокинони мамлакат маҳз дар партави дастуру ҳидоятҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти боз ҳам беҳтар намудани сатҳу сифати хизматрасонии тиббӣ ба аҳолӣ дар тамоми гӯшаву канори мамлакат ба роҳ монда шудааст.
![](https://old.moh.tj/wp-content/uploads/2018/04/8678.jpg")
