1 июли соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таҳти роҳбарии вазири тандурустӣ ва ҳифзи иҷтимоии аҳолӣ Ҷамолиддин Абдуллозода вобаста ба таҳлилу баррасии вазъи хизматрасонии тиббии марказҳои хусусии косметологии кишвар ҷаласаи корӣ доир гардид, ки дар он муовини вазири тандурустӣ ва ҳифзи иҷтимоии аҳолӣ Амирзода Абдухолиқ Амир, сардорони раёсату шӯъбаҳои дахлдори дастгоҳи марказии вазорат ва намояндагони марказҳои косметологии кишвар иштирок намуданд.
Дар ҷаласаи мазкур фаъолияти муассисаҳои косметологӣ мавриди барраси қарор дода шуда, гузаштан аз курсҳои расонидани ёрии аввалияи тиббӣ ва сертификатсия байни кормандони марказҳои косметологӣ зарур шуморида шуд. Пешниҳод карда шуд, ки Ассотсиатсияи косметологҳои Тоҷикистон таъсис дода шавад ва масъалаҳои ҷории ин самт дар нишастҳои ин Ассотсиатсия ҳаллу фасл карда шаванд.
Дар анҷоми ҷаласа баҳри боз ҳам беҳтар намудани сатҳ ва сифати хизматрасонӣ, бартараф намудани мушкилот ва камбудиҳои ҷойдошта, риояи ҳатмии қоидаҳои санитариву эпидемиологӣ, аз ҷониби вазири тандурустӣ ва ҳифзи иҷтимоии аҳолӣ ба масъулин дастуру супоришҳои мушаххас дода шуд.
Гуфтан ба маврид аст, ки айни замон дар кишвар 17 адад марказҳои косметологӣ фаъолият менамоянд, ки аз ин 11 адад дар шаҳри Душанбе ва 6 адад дар шаҳри Хуҷанди вилояти Суғд қарор доранд.
![](https://old.moh.tj/wp-content/uploads/2018/04/8678.jpg")
