Чанде қабл дар деҳаи Барҷангали ноҳияи Роштқалъа бо ибтикори мақомоти иҷроияи ҳокимияти давлатии вилояти Бадахшон дар ҳамкорӣ бо Хадамоти тандурустии Бунёди Оғохон бунгоҳи нави тиббии муҷаҳҳаз бо таҷҳизоти муосири соҳавӣ мавриди истифода қарор гирифт.
Ин дар ҳолест, ки деҳаи Барҷангали ноҳияи Роштқалъа яке аз деҳоти дурафтодаи ин ноҳия ба шумор рафта, ҳаракати мошинҳои мусофиркашу борбар дар роҳҳои ин деҳа кам ба назар мерасад. Аз ин рӯ сокинони деҳа ҳангоми бемории ногаҳонӣ имкон надоштанд дар зудтарин фурсат ба табибон муроҷиат кунанд. Бунгоҳи тиббии қаблӣ дар як бинои кӯҳна ва садамавӣ ҷой гирифта буд.
Маврид ба ёдоварист, ки танҳо дар соли равон дар се деҳаи дурдасти ноҳияи мазкур ду бунгоҳи тиббӣ ва як маркази саломатӣ сохта шудаанд. Ҳамзамон табибони ин бунгоҳҳо ба давраҳои омӯзишӣ ҷалб карда шудаанд ва бо барномаи «Тибби оилавӣ» шинос гардидаанд. Акнун ин табибон на танҳо дар бунгоҳи тиббӣ беморонро муолиҷа мекунанд, балки дар шароити хона низ метавонанд ба ниёзмандон кумаки тиббӣ расонанд.
![](https://old.moh.tj/wp-content/uploads/2018/04/8678.jpg")
