Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Асосгузори сулҳу ваҳдати миллӣ, Пешвои миллат, Президенти  Ҷумҳурии Тоҷикистон муҳтарам Эмомалӣ Раҳмон дар Паёми навбатии хеш ба Маҷлиси Олии  Ҷумҳурии Тоҷикистон  махсус зикр намуданд, ки бояд китобхонаҳо ба маркази муҳими илму фарҳанг табдил дода шаванд, зеро китоб маҳсули ақлу заковати мардуми соҳибтамаддун, омили асосии ҳифзи фарҳанги миллӣ ва яке аз муҳимтарин воситаҳои маърифатнок кардани аҳли ҷомеа буда, қобилияти сухандониву суханрониро сайқал медиҳад, доираи андешаву тафаккур ва ҷаҳонбинии инсонро васеъ ва ӯро ба роҳи дурусти зиндагӣ раҳнамоӣ мекунад.

Дар ҳошияи Паёми Асосгузори сулҳу ваҳдати миллӣ, Пешвои миллат, Президенти  Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон субҳи имрӯз, 27 декабр вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода аз Муассисаи давлатии “Китобхонаи ҷумҳуриявии илмӣ-тиббӣ”-и вазорат  дидан намуд.

Зимни боздид вазири тандурустӣ ва ҳифзи иҷтимоии аҳолии кишвар Насим Олимзода ба фаъолияти китобхонаи мазкур шинос шуда, барои ба китобҳои бадеӣ таъмин намудани он ба масъулин дастуру супоришҳои мушаххас дод.

Қайд гардид, ки дар баробари китобҳои соҳавӣ, ҳамчунин дар китобхонаи мазкур бояд асарҳои бадеӣ аз осори адибони барҷастаи дохиливу хориҷӣ низ гирдорварӣ шуда, барои истифодаи васеи кормандони соҳаи тандурустӣ таъмин карда шаванд.

Ҳамзамон, аз ҷониби вазири тандурустӣ ва ҳифзи иҷтимоии аҳолии Ҷумҳурии Тоҷикистон  Насим Олимзода ба тамоми роҳбарони муассисаҳои тандурустӣ супориш дода шуд, ки дар муассисаҳои хеш як ҳуҷрагӣ барои ташкил намудани китобхона ва бо китобҳои бадеӣ таъмин намудани он ҷудо намоянд.