Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Бо мақсади пешгирии бемории коронавируси нави  COVID-19 тадбирҳои зиддиэпидемиявӣ дар вилояти Хатлон пурзӯр карда мешаванд.

Бо ин мақсад чанде қабл дар шаҳри Бохтари вилояти Хатлон  ҷаласаи навбатии ситоди вилоятӣ оид ба пурзӯр намудани тадбирҳои зиддиэпидемиявӣ баргузор гардид.

Фирӯза Шарифӣ, муовини раиси вилоят, зимни ифтитоҳи ҷаласа гуфт, ки  хушбахтона, дар вилоят теъдоди гирифторони бемории COVID – 19 коҳиш ёфта, айни замон дар табобатгоҳҳои аксари навоҳии вилоят, аз ҷумла ноҳияи Ҷалолиддини Балхӣ, Дӯстӣ, Шаҳритуз, Хуросон, Носири Хусрав, Абдураҳмони Ҷомӣ, Муъминобод, Восеъ, Темурмалик, Шамсиддин Шоҳин, Ховалинг, беморони коронавирус ё илтиҳоби шуш нестанд. Ин ҳолат набояд моро қаноатманд ва хотирҷамъ намояд, зеро вазъи паҳншавии ин беморӣ дар ҷаҳон пешгӯинашаванда аст ва моро мебояд чораҳои зиддиэпидемиявиро беш аз пеш пурзӯртар намоем.

Пас аз ҷаласаи сайёр кормандони мақомоти иҷроияи ҳокимияти давлатии вилоят ва намояндагони воситаҳои ахбори омма оид ба  пешгирӣ аз паҳншавии бемории сирояти нави коронавирус, истифодаи ҳатмии ниқоби муҳофизатӣ, маводи антисептикӣ, риояи қоидаҳои беҳдоштӣ миёни сокинону меҳмонони шаҳри Бохтар корҳои оммафаҳмонӣ гузаронданд.

(Акс аз бойгонӣ)