Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Рӯзҳои 20-24-уми майи соли 2024 дар шаҳри Сеули  Ҷумҳурии Корея марҳилаи дуюми даври омӯзишӣ дар мавзӯи “Зарфиятсозӣ ва ҳисоботдиҳии қаблӣ дар соҳаи тандурустӣ” баргузор гардид, ки дар он намояндагони Вазорати тандурустӣ ва ҳифзи иҷтимоии аҳолии мамлакат- Саид Давлатзода, сардори Раёсати амнияти санитарию эпидемиологӣ, ҳолатҳои фавқулодда ва кумаки фаврии тиббӣ, Асадулло Шарапов, мутахассиси пешбари Раёсати ислоҳот, кумаки аввалияи тиббию санитарӣ ва робитаҳои байналмилалӣ, Раҳмонов Эркин, сармутахассиси соҳавӣ оид ба бемориҳои сироятӣ, Рузиев Муродалӣ, директори Муассисаи давлатии “Пажӯҳишгоҳи тибби профилактикии Тоҷикистон”, Ҳабибов Хуршед, сартабиби Муассисаи давлатии «Беморхонаи клиникии шаҳрии бемориҳои сироятӣ» ва Ҳамидов Зафар, муовини сартабиби Беморхонаи сироятии ноҳияи Данғараи вилояти Хатлон иштирок намуданд.

Тибқи барномаи рӯзи аввал маросими расмии кушодашавии марҳилаи дуюми даври омӯзишӣ оид ба мавзӯи “Зарфиятсозӣ ва ҳисоботдиҳии қаблӣ дар соҳаи тандурустӣ” бо иштироки намояндагони  Эксимбонки Ҷумҳурии Корея, Донишгоҳи Ёнсеи Ҷумҳурии Корея ва Агентии кореягии назорат ва пешгирии бемориҳо (KDCPA) гузаронида шуд.

Ҳамзамон, дар рафти даври омузишӣ иштирокчиён аз Беморхонаи Северанс, Агентии кореягии назорат ва пешгирии бемориҳо (KDCPA) ва аз Маркази миллии тиббии Корея дидан намуданд.

Қайд намудан ба маврид аст, ки дар анҷоми даври омӯзишӣ аз ҷониби иштирокчиён нақшаи амал оид ба назорат ва пешгирии  бемориҳои сироятӣ дар Ҷумҳурии Тоҷикистон омода карда шуда, пешкаши ҳозирин гардонида шуд.

Дар маҷмӯъ, иштирок дар даври дуюми омӯзишӣ оид ба  “Зарфиятсозӣ ва ҳисоботдиҳии қаблӣ дар соҳаи тандурустӣ” ба баланд бардоштани малакаи касбии иштирокчиён ва табодули таҷриба дар хориҷи кишвар, омӯзиши системаи пешрафтаи тандурустии Ҷумҳурии Корея мусоидат намуда, имконият дод, ки мутахассисони соҳаи тандурустии мамлакат аз дастовардҳои тиббии ин кишвар бархурдор гарданд.