Раиси вилояти Суғд Раҷаббой Аҳмадзода дар доираи сафари корӣ ба ноҳияи Деваштич дар ҷамоати деҳоти Ростровут бо сохтмони бинои таваллудхона шинос гардид.
Ёдовар бояд шуд, ки ба истиқболи 30-солагии Истиқлолияти давлатии Ҷумҳурии Тоҷикистон дар ноҳияи Деваштич сохтмону навсозии 309 иншооти гуногун ба нақша гирифта шуда, то имрӯз 200 адади он мавриди истифода қарор гирифтааст. Сокинони ноҳия ба пешвози ҷашни таърихӣ дар корҳои ободониву созандагӣ саҳми арзанда гузошта, барои ободонии маҳал ҷаҳду талош карда истодаанд.
Дар партави дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сокини деҳаи Росровут Мирзоҳаким Камолов ва фарзандонаш бинои таваллудхонаро бунёд намуда истодаанд. Дар ин кори хайр оилаи Камоловҳоро ҳамдиёрон дастгирӣ намуда, тасмим доранд, ки таваллудхонаро мавриди истифода қарор диҳанд.
Бинои таваллудхона аз ду ошёна иборат буда, дорои 10 кат мебошад ва бо ифтитоҳи он сатҳи хизматрасонии тиббӣ дар ҷамоат беҳтар хоҳад шуд.
Раиси вилоят иқдоми сокинони ҷамоатро шоистаи таҳсин унвон карда, таъкид кард, ки бояд ҳифзи солимии ҷомеа дар мадди аввал қарор дода шуда, ҷиҳати пешгирӣ аз бемориҳои сироятӣ корҳо ҷоннок карда шаванд.
Табибони ноҳияи Деваштич бо сипосмандӣ аз ғамхориҳои Сарвари давлат таъкид карданд, ки барои таъмини солимии ҷомеа тамоми кӯшишро ба харҷ медиҳанд.
![](https://old.moh.tj/wp-content/uploads/2018/04/8678.jpg")
