Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Дар ноҳияи Спитамен ба муносибати Рӯзи кормандони соҳаи тиб маҷлиси тантанавӣ доир гардид.

Раиси ноҳия Темурҷон Нуъмонзода кормандони соҳаи тандурустиро бо иди касбиашон табрик намуда, аз нақшу мавқеи онҳо дар таъмини солимии ҷомеа ёдовар шуд. Гуфта шуд, ки дастгирӣ ва қадршиносии кормандони соҳаи тиб дар меҳвари сиёсати хирадмандонаи Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон қарор дорад.

Таъкид гардид, ки баланд бардоштани пояҳои моддӣ ва техникии муассисаҳои тиббӣ аз ҳадафҳои муҳими мақомоти иҷроияи маҳаллии ҳокимияти давлатии ноҳияи Спитамен маҳсуб ёфта, пайваста ҷиҳати муҳайё ва фароҳам овардани шароити арзандаи кории табибон тадбирҳои зарурӣ андешида мешавад.

Сипас, ба як қатор духтурони пешқадам сипосномаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Раёсати тандурустии вилояти Суғд, мақомоти иҷроияи маҳаллии ҳокимияти давлатии ноҳияи Спитамен ва туҳфаҳои хотиравӣ тақдим карда шуд.